4－6/11/2011

field trip - 「荃灣三無」

field trip完之後，就去番工

係荃灣既某某畫室，一間出名「掠學生水」既畫室

平時睇新聞，訪問低收入家庭，父母們都會話好慘，小朋友冇得上興趣班

因為報讀興趣班好貴

所以我一直都覺得，泥得呢間「掠水」畫室學畫畫既小朋友

家境就算唔係大富大貴都一定唔會好差

我只係一個普通既畫班教師

無權過問學生私隱，亦無興趣知道

更何況我教既小朋友只有三至七歲

就更加唔會研究呢d問題

直到星期五field trip完之後既星期日

番到畫室又如常同d小朋友嘻嘻哈哈咁畫畫

畫畫下畫，有一個六歲既小女孩拎左本手冊比我睇

（比我睇入面夾住既功課紙，雖然唔知點解學畫畫都要做功課）

「missy missy～ 你睇下，我今個禮拜功課係畫狗仔呀～」

我一望，睇完隻狗仔之餘，仲望埋隔離一頁既學生資料

本身係想睇佢張可愛既學生相

點知成頁學生資料最搶眼既係寫到大大隻字既學生住址

原來佢住大坡坊

開頭以為自己睇錯，大坡坊？今日field trip去既大二三四坡坊？唔係好窮既人先住架咩？

仲好記得係德寶大廈十三樓

跟住我好奇問佢

「喔？你住大坡坊架？」

「係呀，我頭先同媽咪一齊行過泥畫畫架」

「唔洗撘車啦咁近，missy頭先番學都去完大坡坊，你屋企住十三樓咁高有冇lift架？」

「有～有呀，有lift同埋樓梯」

「咁你喺屋企玩迫唔迫架」

「唔迫～我屋企仲有養貓架，佢好得意架」

「咁好有貓貓陪你玩～」

。

。

。

。

之後都無再問落去，畢竟都算係私隱問題，雖然佢只有六歲

我當下呆一呆，點解住大坡坊，算係較貧窮既家庭

都可以負擔到課外活動既費用？

以我所知佢除左學畫畫之外仲有補習、彈琴

仲要養埋貓仔？

點負擔得起？

跟住我就上網揾左大坡坊德寶大廈既小小資料

睇落都係套房細單位，又可能十三樓無劏到做套房？

又或者係佢真係住套房但係屋企又負擔到佢既課外活動費用？

但係既然係咁，家庭收入唔算差點解仲要住套房？

又或者其實所謂既貧窮唔係指一日三餐都成問題既貧窮？

等等等等既問題真係無辦法考究

亦唔會再去考究

無理由下次番工再問

唯有遲d再親身去訪問一下

講開教畫畫，其實平時見到d小朋友都會好心痛

年紀小小無得玩仲要學十萬樣課外活動

兩歲未夠三歲就已經要學畫畫

問十個起碼有七、八個小朋友，係星期六有三至五個興趣班要上

「呀...missy我好攰呀，今朝學完英文，畫完畫仲要去游水，之後仲要去拉小提琴呀，好攰呀」

（明明畫畫既時侯只係早上十時正）

「下，陰公囉，咁咪好早起身？咁聽日仲洗唔洗學野呀？」

「我今朝七點就起身啦！尋晚仲要做功課做到三點，好眼訓呀，

聽日咪學珠心算囉，之後無啦，平時一至五仲要補習添呀！」

......................................

每次見到d小朋友攰無心機畫我都會比佢地休息

淨係聽佢地講都覺得辛苦

講得唔好聽

根本d父母就痴左線

根本就唔係小朋友既興趣班

根本d父母係怕執輸，死都要迫自己小朋友學埋d唔係佢地唔鍾意既野

唔係小朋友真心鍾意，係被迫既，學都唔會開心唔會成績好啦

仲好記得有一次教一班新既學生，有個六歲既男仔

畫畫完全無心機，成堂好似軟皮蛇咁叭喺到

完全唔肯畫

直到落堂我拖住佢手仔出去揾工人姐姐放學

佢即刻精神晒，跳扎扎咁仲攬住我講byebye

當時真係覺得好奇怪

然後到下一個禮拜又係軟皮蛇咁叭喺到訓

我問佢「其實你係咪唔鍾意畫畫呀？」（語氣柔和地）

佢up頭之後諗左一諗又另頭

「唔緊要喎，missy唔係鬧你，你話比missy聽呀，你係咪唔鍾意畫畫呢？」

「唔.......唔鍾意」

之後我冒住被炒既風險同佢講，叫佢同媽咪講佢唔鍾意畫畫叫媽咪唔好迫佢學

又之後先知道原來佢一早有同媽咪講過

又原來佢媽咪知道佢個仔唔鍾意畫畫仲同畫室主任講「你迫佢畫就得架啦」

？？？？？？？？？？？？？？

咁係咩意思？

好彩地＋唔知點解地，佢仔仔聽我講完之後就唔再討厭畫畫

咁都好d，起碼唔再係被迫去學一樣自己無興趣學既野

雖然我明白，依家既小朋友已經無可能唔上興趣班

當身邊同輩都不停upgrade既時侯，父母們係無可能唔迫自己既小朋友upgrade

只不過

都可以有人道d既，講到底，佢地都係小朋友泥啫